“Искористување на потенцијалите на вештачката интелигенција во справување со загадувањето од цврст отпад во Западен Балкан“

Проектот успешно ја промовираше употребата на алатки базирани на вештачка интелигенција (AI) меѓу еколошките активисти и локалните/националните власти во справувањето со проблемот на дивите депонии. Преку структуриран и колаборативен пристап, еколошките активисти од регионот беа охрабрени и обучени да користат мобилна апликација за идентификација, пријавување и мониторинг на диви депонии. Како резултат на тоа, беше генерирана сеопфатна мапа на депонии базирана на принципот на crowdsourcing (заедничко прибирање податоци).

На локалните и националните власти им беше овозможен пристап до податоци во реално време за локацијата, големината и составот на евидентираните депонии, што им овозможи да преземат навремени и врз докази засновани мерки за управување со отпад и заштита на животната средина.

Проектот ги опфати и успешно ги реализираше следните активности:

1. Деск анализа – Беше спроведена темелна анализа за проценка на актуелната состојба на практиките за управување со отпад, постојните дигитални алатки и релевантната регулаторна рамка.
2. Развој на демо верзија на мобилна апликација базирана на вештачка интелигенција – Беше развиена функционална демо верзија на AI мобилната апликација – Vertex Waste Management, која интегрира функции за геолокација, препознавање на слики и категоризација на податоци за депонии. Апликацијата е бесплатна за преземање на Android и iOS. уреди.
3. Работилници со еколошки активисти, волонтери и локални/национални власти – Беше организирана работилница на која локалните еколошки активисти и волонтери беа обучени за ефективно користење на апликацијата за пријавување и следење на депонии.
4. Дизајн на Менаџмент информациски систем (МИС) – Беше дизајниран и имплементиран менаџмент информациски систем со цел да се обезбеди ефикасен проток на податоци, нивна валидација, анализа и известување.
5. Пробен период и тестирање – Апликацијата помина низ структуриран период на тестирање, при што беа собрани повратни информации од корисниците и институциите, кои беа интегрирани со цел подобрување на функционалноста и употребливоста.

Како резултат на проектот, беше воспоставен практичен модел на управување со отпад со поддршка на вештачка интелигенција, кој може да се реплицира и прошири во други општини во земјите од Западен Балкан. Имајќи предвид дека сите земји во регионот се соочуваат со слични еколошки предизвици, проектот ја зајакна соработката меѓу граѓанските организации и локалните/националните власти, создавајќи цврста основа за поширока регионална примена.

Проектот иницираше и дополнителни активности насочени кон зајакнување на регионалната мрежа на еколошки граѓански организации. Преку подигнување на свеста за негативните последици од неодговорното одлагање отпад, проектот даде значаен придонес кон заштитата на животната средина, подобрување на стратегиите за планирање и управување со отпад, како и создавање дополнителни социјални и институционални придобивки во регионот.

Проектот е финансиран од Фондацијата Отворено Општество.